Localizados sete galeóns da Batalla de Rande nunha nova prospección

A segunda das prospeccións arqueolóxicas que o equipo dirixido polo arqueólogo Javier Luances realizou pola ría de Vigo revelou a posición de sete galeóns afundidos durante a Batalla de Rande. A expedición tivo lugar entre o 7 e o 11 de xullo e fai parte dunha investigación que desenvolve a Universidade de Vigo e a Consellaría de Cultura. As primeiras tomas de contacto tiveron lugar o ano pasado e o obxectivo é esclarecer que patrimonio hai mergullado no fondo da ría. De momento sábese que hai restos de trinta embarcacións e, á falta de analizar polo miúdo toda a información obtida, algunhas delas están en boas condicións.