Era unha vella reivindicación do concello de Lalín que hoxe verá cumprida. O Consello da Xunta acaba de aprobar o decreto polo que o Pazo de Liñares é declarado Ben de Interese Cultural. O decreto, que sairá publicado no DOG estes días, delimita o tipo de protección para o espazo inmediato, así coma o contorno de protección que afecta a unha finca de 22 hectáreas na que se atopan unha capela, as casas de servizo, dous fornos, un alpendre, un hórreo e un pombal. O expediente foi incoado o 27 de novembro de 2008 e contou cos informes favorables da Real Academia de Belas Artes, do Consello da Cultura Galega e da Universidade de Santiago.
