Feijóo prioriza o Xacobeo fronte á Cidade da Cultura, cuxa programación anunciará en outubro

“Chama á porta, está aí e hai que abrirlle” dixo Alberto Núñez Feijóo referíndose ao Xacobeo 2010, por ese motivo, as actuacións neste ano teñen prioridade por riba da Cidade da Cultura. Así o anunciou trala xuntanza que mantivo co alcalde de Santiago, Xosé Sánchez Bugallo, para tratar asuntos relacionados coa cidade. Con respecto ao vindeiro Xacobeo, a programación coñecerase en outubro e recuperarase o antigo logotipo, unha cuestión criticada por expertos publicitarios, que o consideran “absurdo”. Con respecto ao complexo do Monte Gaiás, Feijóo recoñeceu a súa apertura progresiva, pero sen indicar prazos. Ademais, Feijóo apelou á responsabilidade en época de crise para decidir se Santiago asistirá finalmente á Expo Shangai 2010, unha decisión que se tomará na primeira quincena de xuño.