A axenda musical para mañá xoves preséntase moi variada. Dende a clásica ata o "new age", os afeccionados á música en xeral teñen onde elexir. En Compostela, o auditorio acolle un novo programa de abono, onde Ros Marbá dirixe á Filharmonía. Por outra banda, a cantante grega Eleftheria Arvanitaki encherá o Pazo da Ópera coruñés de música "new age".
Humor, nostalxia e felicidade na música
O director da Real Filharmonía e Galicia, Antoni Ros Marbá, afrontará mañá outro programa de abono. E esta vez faino cun cartel que se resume en tres conceptos: humor, nostalxia e felicidade. Tres sentimentos que están relacionados coas pezas que se interpretarán: a Sinfonía nº 82, "O Oso", de Haydn; os "Wessendonck" (Cinco poemas para voz feminina) de Wagner e a Sinfonía nº 1 de Primavera de Robert Schumann. A segunda obra do concerto contará coa presencia dea mezzosoprano alemana Petra Lang.
Música grega na Coruña
A voz de referencia do descoñecido panorama musical grego chega mañá á Coruña. Chámase Eleftheria Arvanitaki, e é unha figura de culto en círculos "new age". E chega para presentar o seu último traballo "Ektos programmates" onde colaboraron a portuguesa Dulce Pontes e a caboverdiana Cesaria Évora, e no que se serviu de compositores de aluguer coma o senegalés Ismael Lo e o caboverdiano Teófilo Chantre, que lle permitiu dar ó seu traballo o legado rítmico da Asia Menor.
Con Eleftheria Arvanitaki recupérase o rebetika, o estilo vocal dos gregos afincados en Turquía. Un estilo musical que se está poñendo moi de moda na conca mediterránea.
