Santa Cristina de Ribas de Sil xa é Ben de Interese Cultural

O Consello da Xunta aprobaba esta mañá a declaración de Santa Cristina de Ribas de Sil coma Ben de Interese Cultural. O mosteiro, considerado un importante exemplo do románico galego, amosa as transformacións artísticas que se deron entre os séculos XII e XIII no país. Ademais, a área de protección que prevé Patrimonio para este ben abrangue unha ampla Zona de Especial Protección dos Valores Naturais que se estende polas dúas beiras do Sil. A declaración obrigará a que calquera obra que se acometa no contorno, mesmo aínda que só provoque modificacións no nivel das augas, teña que contar coa autorización de Patrimonio.