As persoas interesadas en coñecer de preto o Pórtico da Gloria teñen unha oportunidade co programa de visitas que presentaba esta mañá a Fundación Barrié e mais o deán da catedral de Santiago. Os circuítos, que durarán arredor de 50 minutos e se desenvolverán en catro sesións diarias, serán para grupos reducidos de 10 persoas e contarán con guías especializados. Nos mesmos achegarase información sobre o conxunto na Cripta da Catedral, recentemente acondicionada coma Centro de Recepción de Visitantes, e percorreranse os andamios que se están a utilizar para recuperar o pórtico. As reservas poden realizarse no web da Fundación Barrié.
