Ribadavia prepara unha homenaxe a todas as formacións que pasaron pola mostra de teatro

Este ano cúmprese o cuarto centenario da aparición de “El arte nuevo de hacer comedia”, co que Lope de Vega marca o inicio da renovación do teatro clásico. Unha efeméride que a XXV Mostra de Teatro Internacional de Ribadavia non quere deixar pasar e achegará unha montaxe que se estreará primeiro en Olmedo (no Festival de Teatro Clásico). Canda esta, haberá unha proposta creada ex profeso para a inauguración a cargo dun grupo de renome internacional, que aínda non se quixo avanzar. Roberto Pascual, director do encontro, destacou o interese por manter a internacionalización e a consolidación da escrita dramática nesta mostra ao tempo que presentaba a cuarta edición do premio Abrente de Textos Teatrais. Ademais, anunciou que nesta data tan simbólica (cumpre 25 anos) o festival pretende facer unha homenaxe e retrospectiva ás compañía que pasaron pola mostra.