Con 355 votos a favor, 279 en contra e 69 abstencións, o Parlamento Europeo acaba de aprobar unha resolución que subliña a necesidade de prestar unha atención especial aos alumnos que non poden estudar na súa lingua materna. O texto que foi aprobado suprime parágrafos destacados do informe elaborado polo portugués Vasco Graça Moura (Partido Popular Europeo) como o de que os pais poidan elixir a lingua na que queiran educar aos seus fillos nos países con linguas cooficiais ou a solicitude de que ningún escolar sexa privado do ensino na lingua oficial do Estado. O texto aprobado incide na necesidade de preservar a diversidade lingüística e o multilingüismo ao tempo que fomenta a aprendizaxe de idiomas.
