Unha exposición recupera a historia da radio no país

Galicia pola radio é o nome dun proxecto co que os profesores da Universidade de Santiago, Manolo Rodríguez e Mónica Rebolo quixeron recuperar a historia deste medio de comunicación desde o seu nacemento no país. Primeiro abordárono desde un punto de vista académico, nun congreso que se celebrou no 2008 coincidindo co 75 aniversario da efeméride; e agora chega o momento de analizalo desde un punto de vista máis social. Fotografías, gravacións sonoras e variados magnetófonos fan parte desta exposición que hoxe abre as súas portas na Fundación Caixa Galicia (20:00 horas).