Está considerada toda unha icona do concello e é un destacado elemento do patrimonio industrial galego. A deteriorada fábrica da Cros, en Culleredo, transformarase nun centro cultural mercé ao investimento de dous millóns de euros que anunciaba esta mañá a conselleira de Política Territorial, María Xosé Caride. No convenio que o seu departamento asinou co Concello, acórdase que a corporación local achegará o proxecto de edificio e xestionará o centro unha vez rematado. As primeiras tarefas que se desenvolverán serán a descontaminación da área. O custe total da recuperación, coa construción dun auditorio e dunha biblioteca estímase nuns 11,7 millóns de euros.
