Hai xa varios anos que o Proxecto Ríos, coordinado por ADEGA, vixía a saúde ambiental dos nosos cursos fluviais. Agora, a iniciativa amplíase co programa Ríos de de lingua e cultura, que quere sumar ao interese polo medio o coñecemento do patrimonio material e inmaterial vencellados a este ámbito. Deste xeito, ao longo deste ano faranse recollidas de léxico de animais e plantas, explicando os usos ou receitas vencellados aos mesmos. En seguintes fases quérese ampliar a iniciativa a lendas, cantigas ou toponimia deste ámbito. No marco deste proxecto editarase un manual e unha guía de campo que se distribuirán entre os participantes. A iniciativa presentarase oficialmente mañá, día 11 ás 12 da mañá na Galería Sargadelos de Compostela.
