A política marcou a situación do sector audiovisual galego na presente lexislatura. O reparto de competencias entre os dous partidos de goberno condicionou o desenvolvemento da industria ata tal punto que o sector chegou a reunirse co presidente, Emilio Pérez Touriño, para pedir que mediase no conflito. Por ese motivo, a Academia Galega do Audiovisual convidou a representantes dos tres partidos políticos con presenza no Parlamento (PP, PSOE e BNG) para que expliquen as súas visións e propostas para o sector.
Diego Calvo, vicesecretario do PP de Galicia; José Manuel Lage Tuñas, deputado e secretario de formación do PsdeG-PSOE, e Xosé Ramón Paz Antón, deputado do BNG son os relatores dunha mesa redonda que estará moderada por Mayte Cabezas. A cita será o xoves na sede da Fundación Caixa Galicia en Santiago de Compostela (Rúa do Vilar, 19 ás 18:30 horas).
