Un volume de 180 páxinas en branco e negro con capa ríxida por 15 euros. Esta é a proposta coa que Dolmen Editorial recupera Gorka. El viento de Odei, a serie que publicara nos anos noventa Planeta na súa Colección Laberinto. A obra, con guións de Carlos Portela, story-board de Fernando Iglesias e debuxos do catalán Sergi Sanjulián, ve a luz este mes de xaneiro nunha reedición que inclúe abondoso material complementario. Gorka é unha serie de fantasía heróica protagonizada por un curioso home-rata que conseguiu estupendas críticas no momento da súa publicación.
