A situación do antigo Banco de España en Santiago, na praza de Praterías, foi determinante para que Manuel Gallego Jorreto, arquitecto encargado da reforma, pensase nun proxecto que o integre no seu contorno. Así, os edificios dos arredores que tamén pertencen ao Consorcio de Santiago desenvolverán unha función no proxecto: Museo das Peregrinacións e de Santiago. O proxecto de reforma fíxose público onte, o mesmo día no que o Consello de Administración do Consorcio aprobou o orzamento para o 2009. En total disporá de 17 millóns de euros (achegados polo Ministerio, Concello e Xunta) para os seus programas de rehabilitación, recuperación urbana, dinamización turístico-cultural ou o inicio do proxecto de expropiación do Castelo da Rocha.
