A Asociación de Deseñadores prepara unha exposición no CGAC

Transformar un catálogo sobre a imprenta en Galicia nun obxecto de creación. Esta é a proposta que vai achegar a Asociación Galega de Deseñadores, DAG, ao Centro Galego de Arte Contemporánea a partir do vindeiro oito de xaneiro. A exposición Arredor de Barskerville amosará os diferentes xeitos en que os membros deste colectivo transforman un obxecto industrial nunha mostra de creatividade. A exposición iniciará, logo da súa estancia en Compostela, unha xira por todo o país. Con esta proposta a DAG inicia a súa actividade logo da refundación á que se estivo a someter nos ultimos anos. Uqui Permui, presidenta do colectivo que agrupa deseñadores gráficos e industriais, adianta que teñen a intención de desenvolver un plan de formación no que se inclúe o primeiro Workshop de Deseño Industrial en Ferrol para o vindeiro mes maio. Ademais, a asociación tamén lanzará unha publicación en liña.