O teatro contemporáneo é o máis contratado fóra de Galicia no marco da Feira das Artes Escénicas

Un total de 18 compañías realizarán 143 funcións fóra de Galicia coa axuda da Axencia Galega das Industrias Culturais (AGADIC). Son os resultados da Feira Galega das Artes Escénicas que ofrecía bonificacións a teatros, auditorios, festivais e entidades xestoras de redes que contratasen empresas galegas para actuar fóra de Galicia (presentasen ou non montaxes no marco da feira). As actuacións terán lugar en Andalucía, Aragón, as dúas Castelas, Madrid, Estremadura, Euscadi, Murcia, Valencia e Cataluña ao longo do ano que vén. É o resultado máis alto de todas as feiras de teatro celebradas por AGADIC (antes IGAEM). A compañía Teatro do Morcego é a que conta con maior número de funcións contratadas cun total de 48 en Cataluña (a metade coa adaptación teatral de O club da calceta e a outra con Os patios da memoria).