Arqueoloxía debaixo do Ulla

Nun traballo pioneiro no noso país, un equipo de arqueólogos estiveron a realizar a pasada semana unha prospección arqueolóxica no fondo do Ulla. Nun proxecto de colaboración entre a Universidade de Santiago e a empresa Argos, un grupo de investigadores profesionais buscou os restos da mítica turris augusti, un bastión defensivo romano que segundo o historiador Pomponio Mela se situaba na zona. O seu traballo, que se complementa con investigacións en terra, deu polo momento no achado de fragmentos de cerámicas romanas e doutras pezas que poderían ser medievais. O director desta escavación, David Fernández, explícanos polo miúdo esta iniciativa e as dificultades de traballar baixo un río.

Segundo explica Fernández, con anterioridade a esta investigación afeccionados do Clube de Actividades Subacuáticas da Universidade de Santiago fixeron algunhas inmersións e atoparon algúns restos xa nos anos setenta. Na mesma zona, o Club García Alén, coa colaboración do arqueólogo Antonio de la Peña realizaron tamén unha pequena investigación na área durante a década a seguir. Non entanto, “esta é a primeira escavación deste tipo realizada por arqueólogos profesionais”, explica.