A Vía Nova contará cun Plan Director

A conselleira de Cultura, Ánxela Bugallo, anunciou que nos vindeiros días aparecerá no Diario Oficial a licitación do Plan Director para a Vía Nova. O proxecto centrarase nos preto de 30 quilómetros de vía romana que se atopan entre Portela do Home e Bande, en Ourense, e contará cun investimento de 150.000 euros ata 2009. Precisamente nesta zona concéntrase un grande número de restos romanos, coma o campamento Aquis Querquennis ou os baños de Aquis Oreginis. O futuro Plan Director recollerá pautas para a posta en valor e a conservación dos elementos patrimoniais vencellados á vía.