Falece Xesús Jares, un dos pais da Educación para a Paz en Galicia

Catedrático de Didáctica e Organización Escolar na Universidade da Coruña, fundador de colectivos coma Educadores pola Paz de Nova Escola Galega e presidente da Asociación Galego-Portuguesa de Educación para a Paz, Xesús Jares é considerado unanimemente coma un dos principais impulsores da educación para a paz en Galicia. O pasado sábado falecía vítima dunha longa enfermidade, e domingo os seus restos foron incinerados en Vigo nunha cerimonia civil. Precisamente para o vindeiro dez de decembro está prevista a presentación do volume colectivo Educación e paz III. Literatura e paz, obra que coordinara Jares e na que participan corenta creadores das nosas letras.