Imaxe do traballo de Mariano Casas
A Deputación da Coruña facía público onte o fallo do IV Premio Castelao de Banda Deseñada. Mensaxes, unha obra de 52 páxinas de Mariano Casas Gil foi a seleccionada entre as cinco historias longas que se presentaron ao certame. O xurado, composto por Miguelanxo Prado, Horacio Altuna, Ángel de la Calle, Agustín Fernández Paz, Carlos Portela e mais a deputada responsable da área de Cultura, Caridad González Cerviño, destacou que se trata "dun magnífico libro que narra unha historia asentada nun guión de insólita solidez e unha proposta formal, sinxela e eficaz que, nun orixinal artificio metalingüístico, xoga un papel decisivo na narración". A obra narra as últimas horas dunha parella que emprega a banda deseñada para deixar constancia do que lles está a pasar. O premio conta cunha dotación de 6.500 euros.
