Política Lingüística e oito editoriais desenvolverán actividades de dinamización en 70 concellos

Setenta concellos e arredor de 50.000 rapaces e rapazas de entre 4 e 18 anos participarán nas actividades de dinamización que presentaba esta mañá Marisol López, secretaria xeral de Política Lingüística, canda a representantes de oito editoras galegas. A Nosa Terra, Baía, Galaxia, Kalandraka, Oqo, Rodeira, Sotelo Blanco e Xerais participan nunha iniciativa que quere incidir no tramo de idade no que máis periga a transmisión da nosa lingua e que se desenvolverá ao longo deste outono. As propostas das distintas editoras inciden en aspectos coma a oralidade, a escrita creativa, a música ou o audiovisual. Entre as propostas máis curiosas, A Nosa Terra propón obradoiros de creación de graffiti da man de Anxo Fariña e Galaxia presenta Flis-fli-ris-flás un proxecto que concentra a lectura, os contidos multimedia e mais o teatro. A campaña conta cun orzamento total de 621.000 euros, dos que política lingüística achega 570.000. Segundo asegurou López, esta é "unha das campañas máis ambiciosas" do seu departamento.