Nas últimas dúas décadas xurdiron en Galicia máis de vinte espazos relacionados coa arte, naceu a Facultade de Belas Artes e os profesionais galegos comezaron a despuntar. Este feito contribuiu a normalizar esta disciplina no noso país e sobre este contexto falarase no foro de debate “Creación artística e identidades culturais” (18-19 de setembro). É o cuarto dos seis encontros creados con motivo das vodas de prata do Consello da Cultura e está coordinado por María Luisa Sobrino. Neste encontro, artistas, críticos, comisarios, xornalistas e directores de museos debatirán sobre tres espazos de reflexión: musealización, industria cultural e espectáculo; o traballo de artistas e as institucións e, a arte e a cultura nos medios de comunicación.
