O colectivo Escoitar.org xuntou en novembro do ano pasado a un grupo de alumnos do seu obradoiro no Centro Galego de Arte Contemporáneo e gravaron 40 sons da cidade de Santiago. Con ese material, publicado no mapa sonoro en liña dispoñible no web do colectivo, o compositor Carlos Suárez compuxo unha "paisaxe sonora para ser bailada" titulada Cadra Santiago. Os intérpretes físicos desta paisaxe serán os bailaríns do Centro Coreográfico Galego, que bailarán esta peza de sons composteláns esta noite ás 21 h. nos xardíns de Fonseca da Universidade de Santiago. Cadra Santiago é, segundo os seus creadores, unha "creación que busca expandir a escoita somerxéndonos nun espazo cuadrafónico".
