Ribadavia homenaxeará as irmás que axudaban aos xudeus a fuxir a Portugal

Ao longo da II Guerra Mundial, as irmás Xulia, Lola e Amapro Touza Domínguez participaron, desde Ribadavia, nunha rede que permitiu a fuxida a Portugal de xudeus perseguidos polo réxime nazi. Para lembrar esta pouca coñecida historia, a ONG Asemblea Universal Sefardí `Isaac Siboni´ celebra o vindeiro sete de setembro unha homenaxe nesta vila. No acto está previsto que participen familiares das tres mulleres, xa falecidas, e que se faga unha ofrenda nas súas tumbas. O pasado mes de xuño, esta mesma organización xa lembrara as irmás Touza noutra homenaxe en Xerusalén.