Carballiño celebra as vodas de prata das Xociviga que abren unha nova etapa

As Xociviga (Xornadas de Cine e Vídeo de Galicia) naceron en 1984 co obxectivo de converterse nun punto de encontro dos profesionais do sector audiovisual pero desde entón conseguéronse moitas das cousas que alí se reivindicaban. O audioviusal profesionalizouse, proliferaron moitos outros puntos de encontro naceron numerosas entidades para promover o sector e, por iso, esta edición tiña dous obxectivos: dunha banda homenaxear a todas as persoas que fixeron posible manter o evento e, da outra, iniciar unha nova etapa.

Ata o vindeiro 10 de agosto desenvólvense en O Carballiño as Xornadas de Cine e Vídeo de Galicia. Un programa cargado de actividades no que destaca un espazo para a retrospectiva e para facer memoria destes 25 anos de traballo. Para iso haberá dúas mostras, unha que recuperará todos os carteis do evento e outra que recolle fotografías e documentos das actividades desenvolvidas nestes anos. Ademais, Miguel Anxo Fernández recibirá a súa insignia de ouro polo traballo que realizou na organización desta xornada. Pero non será o único, Carlos Velo, José García ou José Luis Cuerda son algúns dos nomes que tamén se recordarán estes días.

Ademais, a concelleira de cultura do Carballiño, Inmaculada Ucha anunciou que as Xociviga entran nunha nova etapa que comezará a perfilarse unha vez que remate esta edición.