Desde as nove desta mañá está na rede a Enciclopedia Galega Universal (EGU). Segundo anunciou esta mañá Bieito Ledo, director da editorial Ir Indo, a obra pode consultarse de xeito gratuíto, cando menos ata depois do verán. Ledo recoñeceu que o apoio das Consellarías de Cultura e de Educación, e mais das Secretarías de Política Lingüística e de Emigración permitiu a apertura destes contidos. No entando, sinalou que os custes de actualización do proxecto fai que a editora busque novas fontes de financiamento para a obra. Entre os novos contidos da EGU hai contidos multimedia que o editor anuncia que se ampliarán nun futuro próximo. A editora retirara de Internet o mes pasado o seu Dicionario de Galego logo de que quedase deserta a convocatoria dun concurso público para apoiar este tipo de obras.
