Diñeiro. Iso é o que fai falta para afrontar a restauración das pinturas medievais da igrexa de Santa María do Campo (Marín), unha xoia románica do século XII ou XIII. Aínda que a restauración xa conta con tódalas autorizacións da Dirección Xeral de Patrimonio, carécese de financiamento para afrontar a obra. Entrementres, as tamén pinturas medievais da igrexa burelá de Vila do Medio, de finais do XV, están ameazadas pola humidade e en pouco tempo iniciaranse as obras de restauración.
Escaseza de exemplares
Non hai moitos exemplos de arte pictórica medieval en Galicia. Os altos niveis de humidade que inzan as igrexas galegas e as frecuentes remodelacións ás que foron sometidas fan que moita da pintura medieval realizada nos interiores destes edificios desaparecera co cabo de tempo. Un exemplo dos ataques da humidade e do deterioro son as pinturas situadas no altar e nun dos laterais da igrexa de Santa María do Campo (Marín), sinala Diario de Pontevedra. Descubertas ó retirar un retablo do altar, o mural representa un Cristo triunfante ó carón de varios anxos con trompetas. Aínda que a parroquia conseguiu tódolos permisos para a restauración e posta en valor turístico e cultural das pinturas, falta o máis importante: o diñeiro. Outras dúas igrexas da zona están pendentes de restauración semellantes: Santo Tomé de Piñeiro e San Xulián. Cultura descoñece cando se poderá acometer a obra.
Burela
A corporación municipal de Burela encargou á empresa Ollarte unha revisión das pinturas de finais do século XV que se atoparon na igrexa da Vila do Medio. O delegado de Cultura, Víctor Edrosa, decidiu chamar ós técnicos de Ollarte alarmado pola presencia de abundante humidade na área das pinturas. "Non nos gustaba a pinta que tiñan", sinalou o edil. A valoración dos expertos foi positiva. Ata o momento, a humidade non está a danar as pinturas, aínda que é preciso facer algunhas obras destinadas a secar a humidade interior da parede na que están asentadas. O Concello de Burela instalará unha drenaxe no lateral da igrexa, segundo sinalou El Progreso.
