Os interesados en coñecer as novas de BD que se desenvolven na Coruña téñeno máis fácil do que nunca. O novo servizo de subscrición que acaban de pór en marcha as Bibliotecas Municipais desta cidade permitiralles aos lectores recibir no seu propio móbil mensaxes cos principais eventos locais. As bibliotecas xa facilitaban mediante este sistema información sobre as súas novas adquisicións. Pola súa banda, a Biblioteca Ánxel Casal de Compostela inclúe na súa programación diferentes actividades de Banda Deseñada ao longo dos meses de xullo e agosto. Sesións de animación á lectura dos cadriños e dous obradoiros permitirán a interesados de sete ou máis anos introducirse neste mundo. Por se fose pouco, a biblioteca González Garcés da Coruña programa para os vindeiros días 20 e 21 de agosto un segundo obradoiro encol da novena arte a cargo de Manel Cráneo, que xa impartiu un primeiro no mes de xuño.
