A construción da sociedade porteña ten moito que ver con Galicia, concretamente cos milleiros de galegos que emigraron ata a capital bonaerense. Así o destaca o libro “Buenos Aires gallega” que reune as comunicacións presentadas no congreso homónimo celebrado na capital arxentina en 2007 e que se deu a coñecer onte no Consello da Cultura Galega. Unha presentación relacionada con feito de que estes días está en Galicia a comisión arxentina que se encarga de elaborar o anteproxecto do Museo da Inmigración. O Consello da Cultura, a través do Arquivo da Emigración, acordou colaborar con esta entidade, que ten previsto abrir as súas portas para o 2010.
