Celébrase o Día da Literatura Infantil e Xuvenil, un sector fundamental para as nosas editoras

A literatura infantil e xuvenil (LIX) supón na actualidade un dos piares do mundo editorial tanto en Galicia como no estado. Segundo o “Anuario do Libro Infantil e Xuvenil 2007” que o escritor Xosé A. Neira Cruz elaborou para a editora SM, a nivel estatal este ámbito supuxo 60 millóns de exemplares editados e medrou un 14,8% a respecto do ano anterior. En Galicia, segundo o autor, editoras coma Kalandraka e Oqo están a conseguir facerse referentes internacionais neste ámbito. Precisamente a coincider coa celebración do Día da Literatura Infantil e Xuvenil, a Consellaría de Cultura e mais GALIX presentan dous novos volumes da colección “Lagarto pintado” mentres unha vintena de editoras galegas están presentes na Feira Internacional de Boloña, especializada neste tipo de obras.