A Cidade da Cultura acollerá un centro IBBY para difundir a literatura infantil e xuvenil

O complexo do monte Gaiás destinará un espazo importante para os máis pequenos. Ademais de contar co Museo dos Nenos, a consellaría de Cultura deu a coñecer onte que albergará un Centro IBBY da Literatura Infantil e Xuvenil para a Diversidade Cultural que atesourará fondos desta materia en linguas e culturas minorizadas. IBBY (International Board on Books for Young People) é a máxima institución neste ámbito e hoxe conta cun único centro destas características en Oslo. Entre obxectivos deste centro figura crear a primeira biblioteca internacional especializada en estudo e divulgación da literatura escrita para a infancia e a xuventude, así como promover iniciativas culturais para nenos.