A Fundación Feima publicará reedicións de obras históricas da nosa banda deseñada

“Os compañeiros da orde da pedra”, a primeira obra comercial de Miguelanxo Prado que viu a luz a comezos dos anos oitenta como tiras en “La Voz de Galicia” será o primeiro número da colección que a Fundación Feima abre para recuperar obras históricas da banda deseñada galega. A “Biblioteca Feima de Clásicos da Historieta Galega”, que é como se chama a colección, desenvólvese en colaboración con El Patito Editora, e está previsto que a súa segunda entrega sexa unha escolma das tiras que publicou Eduardo Galán en “Diario de Galicia”. As obras contarán con prólogo e información de contexto.