O leigado dos irmáns Antón e Ramón Vilar Ponte e mais de Ricardo Carvalho Calero está depositado desde hai anos no Parlamento de Galicia. Agora, mediante un convenio que esta institución asina hoxe, o Consello da Cultura Galega abordará a catalogación, ordenación e dixitalización destes documentos. A intención é que o traballo estea rematado en seis meses e que sexa despois máis facilmente accesible a investigadores e ao público en xeral.
