A Asociación de Escritores entrega o seu premio ao Escritor/a Galego Universal a Nancy Morejón

O presidente da Asociación de Escritores en Lingua Galega (AELG), Cesáreo Sánchez, entregáballe onte na Habana o premio Escritor/a Galego Universal á poeta cubana Nancy Morejón. A autora, coñecida, ademais de pola súa obra, polo seu traballo de dinamización cultural, defensa da muller e tradución, participará na Cea das Letras que a AELG organiza anualmente. No mesmo acto entregaranse os premios que a Asociación outorgou a Xosé Vázquez Pintor, á Asociación Socio-Pedagóxica Galega e mais á Mostra de Teatro de Ribadavia.