Mil quiñentos rapaces participarán no maior encontro informático de Galicia

Novos, galego e informática. Estes son os ingredientes cos que o Xuventude Galicia Net (XGNet), o maior encontro informático do país, leva trunfando durante anos. Este ano, as 1.500 prazas que ofertaban esgotáronse en 28 segundos, o que evidencia a demanda que ten este encontro. As principais novidades desta edición pasan pola participación de maiores e de persoas con discapacidades, o potenciamento do software libre e a presenza das últimas novidades no campo da robótica. Ademais das actividades programadas para os participantes (proxeccións, conferencias, certames...), o XGNet ofrecerá máis actividades abertas para todo o público.