Un estudo reivindica a creación dunha imaxe de marca e de circuitos específicos para o teatro

Muller, entre trinta e corenta anos, residente en cidades e con estudos universitarios. Este era o perfil medio do público que asiste á Rede Galega de Teatros e Auditorios segundo un estudo feito no 2006. Pero o IGAEM quería coñecer máis sobre este público potencial, que se integra na chamada xeración “mileurista” e volveu encargarlle á empresa Cidadanía que fixera un estudo máis concreto sobre as características e motivacións dese sector. O resultado foi unha entrevista realizada a 13 mulleres residentes en Vigo e Ourense co ánimo de coñecer as percepcións sobre o teatro, os seus hábitos de consumo, a avaliación e os condicionantes.

Continúa lendo a nova

Nas entrevistas persoais e nas discusións de grupo realizadas ás trece mulleres que forman a mostra, conclúese que existen, principalmente, dous tipos de condicionantes á hora de asistir ao teatro. Un de tipo laboral, pola dispoñibilidade de tempo libre, e o outra económico. Neste último, o grupo analizado establece a barreira sicolóxica dos 20 euros para asistir a un espectáculo.

Segundo os principais resultados dese estudo hai catro tipo de factores claves á hora de asistir ao teatro: o prezo, a accesibilidade, o tempo libre e unha maior promoción dos espectáculos na prensa, radio, televisión e internet. Un feito polo que reclaman a necesidade dunha imaxe de marca que permita identificar as temáticas e os axentes teatrais implicados. Ademais, no grupo dos factores sociais, o estudo analizado bota en falta máis teatro amador e universitario así como a creación de circuítos de exhibición orientados a espectadores concretos.