A Noite da edición, que vai celebrarse o vindeiro sábado no Liceo Casino de Pontevedra, repartirá por segundo ano consecutivo os diferentes premios cos que os editores recoñecen obras, autores e iniciativas. Así optan ao Premio Ánxel Casal ao libro as obras Feísmo. Destruír un país da editorial Difusora; O bosque dos raposos aforcados, de Rinoceronte Editorial; O suxeito postmoderno de Galaxia; Os libros arden mal de Edicións Xerais e Terra e nostalxia. Galicia rural de Baía Edicións. O Premio Xosé María Álvarez Blázquez ao autor dispútase entre a Área de Terminoloxía do Servizo de Normalización Lingüística da USC, Manuel Rivas e Teresa Moure. O Clube de Lectores Biblos, o programa Libro aberto de TVG e o Salón do Libro Infantil e Xuvenil de Pontevedra optan ao Premio Francisco Fernández del Riego á cooperación no labor editorial. Na gala tamén coñeceranse os nomes do gañadores aos premios ao libro mellor traducido, ao mellor ilustrado e ao mellor libro infantil e xuvenil. Sabino Torres Ferrer (o máis veterano dos editores galegos en activo, responsable de Hipocampo Amigo) recibirá o Premio á edición histórica galega e Isaac Díaz Pardo será nomeado presidente de Honra da AGE.
Máis información na Asociación Galega de Editores
