Vigo converteuse onte na capital mundial do canto improvisado. Cubanos, galegos e canarios reuníronse nunha demostración das diferentes formas de improvisación tradicional no V Certame Internacional de Regueifas organizado polo Centro Veciñal e Cultural de Valladares.
Participantes
Calviño de Tallo, Suso de Xirnes, Guillermo da Rabadeira e Luis Caruncho representando ós regueifeiros galegos. Roberto Pérez e Luis Paz Papillo da banda dos versadores cubanos, ofreceron onte un recital das súas habilidades que tivo como marco o Conservatorio Superior de Música. Ademais deles, xa profesionais do verso, os participantes nos obradoiros que durante os últimos días se viñeron celebrando no barrio por iniciativa da Federación de Asociacións de Veciños "Eduardo Chao" e impartido por Luis Caruncho amosaron o seu bo facer no auditorio do propio Centro Cultural.
Onda os versadores interviron o cubano Fernando "Murguita" e o canario José Luis Martín tocando a guitarra e o laúde respectivamente.
Comida e chat
Ademais do xantar no que se reuniron todos os participantes e os afeccionados ás regueifas, o encontro incluíu unha novidosa iniciativa, a Ciberregueifa. Este encontro pretendía unificar a improvisación tradicional coas novas tecnoloxías mediante un chat, no que entre as oito e as once da noite se amosou a agudeza e a creatividade dos participantes pero, nesta ocasión, por escrito. É a primeira vez que se organiza un ciberencontro deste tipo en Galicia.
Obxectivos
Segundo sinala Carlos Alonso Piñeiro, promotor deste encontro, sinala que con este encontro preténdese colaborar na recuperación desta tradición artística galega, que actualmente tende a desaparecer. Onda esta idea está a intención de achegar ás novas xeracións esta disciplina e pór en contacto improvisadores de distintas partes do mundo.
