Os libreiros súmanse aos apoios da cultura para Isaac Díaz Pardo

A través dun comunicado o gremio de libreiros manifestou publicamente o seu apoio e solidariedade con Isaac Díaz Pardo. A Federación de Libreiros de Galicia agradece o traballo levado adiante polo intelectual e a súa aposta polo libro así como a súa achega á recuperación da memoria histórica na colección bibliográfica Serie Documentos de Ediciós do Castro pola que a Federación de Libreiros lle outorgou o Premio Irmandade do Libro. “Na inxusta e incomprensible situación pola que está a pasar Díaz Pardo – di o comunicado público-, os libreiros queremos transmitirlle o noso afecto e gratitude e pedir con forza, a quen competa, respecto e xustiza para unha das figuras máis senlleiras da cultura galega”.