Os gañadores da primeira edición do premio Concerto Autor Jazz Galicia no 2005, S.O.S. Trío, xa teñen na rúa o seu primeiro traballo discográfico. Seis das oito pezas do disco “106 underground st.” (FreeCode Jazzrecords) son composicións propias destes tres músicos unidos polo Seminario Permanente de Jazz de Pontevedra no ano 2001. Virxilio da Silva (guitarra), Jose Carlos Ferro (contrabaixo) e Max Gómez (batería) coñecéronse na primeira edición dese seminario no que seguiron como alumnos durante as catro edicións do mesmo participando nas gravacións dos discos do SPJ así como nos concertos Pontejazz 2004 e 2005. O grupo ten como obxectivo fundamental a procura dun son propio a partir da posta en común das ideas de cada un dos compoñentes para o cal apostan polas composicións orixinais.
Máis información sobre o SPJ
