Encontros de BD, fanzines e caricaturas chaman polos autores e as publicacións de Galicia desde Portugal

O I Festival BD que se vai celebrar entre o 9 e o 28 de Abril en Beja, Portugal, conta co ourensán David Rubín coma un dos seus autores convidados. Rubín participará neste evento canda a figuras coma Alain Corbel, José Carlos Fernándes ou Víctor Santos. Mentres, desde Vila Real convócase o IX Salão Luso Galaico de Caricatura que versará este ano sobre a moda e que está aberto a autores das dúas bandas do Miño. Os interesados deberán enviar os seus traballos antes do vinte e cinco de abril para optar ao primeiro premio, dotado con 2.000 euros. Finalmente, está a se preparar para o vindeiro mes de maio a VIII Feira Internacional do Fanzine, que se celebrará en Almada. Os organizadores convidan aos galegos a enviar para este encontro todo tipo de publicacións que se teñan feito no país.

O Festival de Beja ten este web oficial; as bases do Salão de Caricatura no noso apartado de Certames, máis información neste web; e sobre a Feira do Fanzine no web da bedeteca