Será no vindeiro día 2 de setembro cando a real Academia Galega faga petición oficial ao Concello de Santiago de que os restos mortais de Xosé Fontenla Leal (Ferrol 1865-A Habana 1919) pasen ao Panteón dos Galegos Ilustres en San Domingos de Bonaval. O galeguista ferrolán Fontenla Leal foi un dos impulsores da Real Academia e do himno galego. A recuperación dos restos desde Cuba até Galicia é froito do esforzo persoal e das xestións do estudoso Jaime López, que nestes días con outros ferroláns históricos, o coro Toxos e Froles do que López foi presidente, presentan un disco que recolle a primeira gravación que se fixo do himno galego. O disco, titulado “Romaxe galega, 1922” contén a restauración sonora de vinte temas gravados pola coral nese ano, cancións populares de toda a xeografía galega.
Máis información en Galicia Hoxe
