O Consello da Cultura Galega acaba de publicar na súa plataforma de podcasts, Agora, tres conferencias impartidas por Xesús Alonso Montero na institución. "Algunhas reflexións sobre o 10 de marzo de 1972" aborda os episodios de represión franquista e os conflitos sociais no Ferrol de 1972, dos que Alonso Montero tivo un gran coñecemento por mor da militancia comunista. O meu compromiso intelectual máis próximo a Sartre que a Camus permítenos coñecer a súa posición nos grandes debates intelectuais da Europa dos anos 60 e 70 e Para unha interpretación integral da obra rosaliana supón unha viaxe ao seu dilatado coñecemento de Rosalía de Castro.
