O casino de Carballo acolle este sábado a presentación oficial da Asociación Musical Costa da Morte. Aínda que creada a mediados de 2024, a asociación foise articulando e sumando integrantes e é agora cando dan o paso de presentarse como primeira actividade. O acto servirá para presentar os plans iniciais de actividade da asociación, segundo os obxectivos recollidos nos seus estatutos. Haberá un coloquio aberto, intervencións de representantes e un pequeno encontro musical con actuacións en directo de varios membros da entidade. A asociación nace co obxectivo de promover a música e as actividades culturais na Costa da Morte, unha zona con rica tradición musical pero que ao seu ver precisa de maior coordinación entre bandas, solistas, agrupacións locais, e demais axentes relacionados co panorama musical da zona.
Arestora xa son varias as agrupacións musicais asociadas, dos máis diversos perfís musicais e xéneros, desde o rock Metal ata a música tradicional, pasando polas formacións de versións. Unha das funcións que terá esta asociación será buscar o patrocinio, apoio económico e/ou loxístico das distintas administracións, e todo tipo de axudas destas ou doutras entidades que poidan estar interesadas nas actividades que desenvolve esta asociación, para que a mesma poida dotarse de material e recursos que lle permitan: facilitar o camiño a novas formacións; crear eventos periódicos de relevancia, no que a parte de algunha banda de renome, participen os grupos que pertenzan á Asociación; así como contactar con músicos profesionais, mestres de música, técnicos de son, enxeñeiros de estudio de gravación, etc., para ofrecer charlas formativas ós membros da Asociación.
