Óscar Manuel Guzmán. Fonte: Galipedia
O Concello do Grove daba a coñecer este 17 de decembro o fallo do co XXXII Premio de Novela Curta Manuel Lueiro Rey. O autor Óscar Manuel Guzmán Álvarez impúxose neste certame e levará 3.000 euros pola súa novela Só os mortos saben a verdade, que sairá publicada por Edicións Xerais.
Armando Requeixo, Ánxela Gracián, Carmen Ferreira Boo, Miguel García e José Carou Rey, gañador da anterior edición, compuxeron o comité de selección desta xeira.
O seu fallo destaca da obra "que se trata dunha novela de suspense moi ben enfiada cunha trama que salienta pola tensión narrativa, o ritmo áxil e o uso dun fino humor e ironía, cunha boa e traballada caracterización dos personaxes, que resultan ser moi enxeñosos, e cuns diálogos fluídos e realistas, no que nada é o que parece".
Ademais, considera que a novela "consegue manter a intriga con moita solvencia, de tal forma que o lector non é quen de inferir o seu final tan inesperado como impactante, sorprendente e insospeitado, no que queda reflectida unha das paixóns máis baixas do ser humano: a vinganza".
