Diálogos entre nomes da literatura e do audiovisual arredor do concepto de lugar e a relación co espazo que habitamos. Esta é a proposta da miniserie No seu lugar, outro que desde este 2 de decembro está dispoñible no web AGalega.gal.
A produción da Corporación de Servizos Audiovisuais de Galicia (CSAG) conta con tres capítulos nos que participan Lucía Aldao e Coral Piñeiro, Fran Rodríguez e Keith Payne, e Álvaro Gago e Berta Dávila. As galerías de Santiago de Compostela, o porto de Vigo e o barrio coruñés dos Mallos son os escenarios desta proposta, e achegan reflexións sobre o paso do tempo, a emigración e o "ser de barrio", respectivamente, desde olladas que combinan as linguaxes poéticas e cinematográficas.
