Miguel Leiro gaña o Premio Nacional de Deseño

O Ministerio de Ciencia, Innovación e Universidades ven de conceder o Premio Nacional de Deseño 2025, na modalidade Xoves Profesionais a Miguel Leiro Fernández-Cuesta. O xurado ve nel "expoñente e exemplo dunha extraordinaria xeración de deseñadores novos" e recoñece "a súa audacia creativa e capacidade para dinamizar e visibilizar o deseño emerxente en España". Tamén valora a súa capacidade para xerar redes e o seu compromiso coa pedagoxía e a experimentación, o que fai del, a ollos do xurado, "un dos profesionais novos máis influentes da nova xeración do deseño nacional". O galardón ten unha dotación de 30.000 euros.

Miguel Leiro, fillo do escultor Francisco Leiro, é deseñador industrial. Formouse no Pratt Institute de Nova York e conta cunha ampla experiencia internacional. Leiro destacada polo seu enfoque experimental e multidisciplinar, grazas a unha combinación da investigación material e conceptual coa creación de obxectos e espazos que dialogan coa historia, a antropoloxía e a cultura contemporánea. Profesionalmente traballou en estudios de referencia e desenvolveu proxectos como Civitá, na Real Academia de España en Roma, onde integrou saberes artesanais e académicos na produción de pezas únicas. A súa meirande achega ao ecosistema do deseño español, segundo o xurado, é a fundación e dirección da asociación cultural Office of Design e da bienal Mayrit, unha plataforma que, desde 2020, abriu espazos creativos a novos talentos e propostas arriscadas, conectando a deseñadores independentes con institucións, medios de comunicación e público internacional.