A Rede Museística Provincial de Lugo (RMPL) presentaba este 19 de xuño na Cidade da Muralla o Museo da Migración. Este proxecto virtual quere ser "unha ferramenta educativa para transformar a mirada sobre os movementos de persoas ao redor do mundo" e achega diferentes testemuñas sonoras sobre esta cuestión.
Segundo apunta a presentación do Museo, o núcleo central é unha colección de voces accesible a través dun mapa virtual. Trátase de "achegas sonoras que, a través de experiencias persoais, trazan unha cartografía emocional da migración. Testemuñas que falan de perdas, aprendizaxes e esperanza e que está aberta á participación de calquera persoa que desexe formar parte".
Canda a isto, o web do proxecto compila os traballos que a Rede Museística Provincial desenvolveu ao longo do tempo arredor desta temática, e inclúe tamén unha selección de recursos didácticos para traballar temas como a memoria, a diversidade e o antirracismo.
Estes contidos compleméntanse cunha serie de actividades "que servirá para visibilizar os proxectos, procesos e accións -presenciais e dixitais- que a RMPL impulsa ou acompaña, e que contribúen a facer medrar este museo vivo. Tamén será un lugar para visibilizar artivistas, educadoras e iniciativas inspiradoras", sinala a presentación da iniciativa.
