Berta Dávila
A escritora Berta Dávila acaba de ser recoñecida polo Premio Ostana Scritture in lingua madre 2025 na categoría Giovani polo "seu compromiso estético e vital coa lingua galega". O galardón entrégase no transcurso do Festival a finais de xuño, que se realiza nesta localidade do Piamonte italiano e é organizado pola asociación Chambra d'Oc e a Comune de Ostana. A organización recoñeceu de Dávila "o seu percorrido excepcional como escritora e poeta, a súa capacidade de renovar a linguaxe literaria cunha voz auténtica e orixinal, e o labor constante de difusión da literatura galega máis alá das súas fronteiras naturais". É a cuarta persoa distinguida en representación da lingua galega tras Manuel Rivas, que recibiu en 2019 o Premio internacional, Craig Patterson, recoñecido como tradutor e Alfredo Conde, recoñecido na primeira edición.
