Anómico teatro estrea o monólogo 'Inconfesables actos de fascismo ordinario'

A sala Teatro Ensalle de Vigo (Rúa Chile, 15) acolle este venres e ao longo da fin de semana a estrea da montaxe 'Inconfesables actos de fascismo ordinario' da compañía Anómico teatro. Asinada e interpretada polo dramaturgo Julio Fernández Peláez, recente gañador do Premio Laudamuco para textos teatrais, o espectáculo é unha proposta de anticonferencia na que el enfróntanos cunha serie de accións atravesadas pola idea dun fascismo que pasou de ser latente a ser argumento firme da realidade. Accións antipoéticas, anticómicas, antitráxicas, antiegocéntricas, antidiscursivas e decididamente ridículas que se deixan arrastrar polo espírito da ironía e a crítica radical cara todo aquilo que pasa a ser vítima da nosa mirada. "O fascismo é un fodido cálculo matemático, unha solución rápida ao problema do caos climático e a outras moitas outras cuestións de convivencia cotiá ou de orde público. O fascismo anula a importancia do tempo e a brevidade histórica dos acontecementos. O fascismo dá morte á memoria para lanzarnos a un futuro espectral. O fascismo está ata na sopa e non podemos evitalo", contempla o texto. A sesisón de estrea será este venres, 6 de xuño ás 20:00 horas, e haberá outras dúas sesións sábado e domingo no mesmo horario.